Tónlistarstarf

Tónlistarstarf Neskirkju er fjölbreytt. Steingrímur Þórhallsson organisti stýrir tónlistarstarfi kirkjunnar. Hann stýrir jafnframt Kór Neskirkju en meginverkefni hans er að leiða safnaðarsöng í kirkjunni og að flytja margs konar tónlist við kirkjuathafnir og á tónleikum. Við Neskirkju starfa einnig barnakór, stúlknakór og kór eldri borgara.

Stúlknakór Neskirkju (5-7 bekkur)

Stúlknakór Neskirkju er opinn stúlkum í 5 - 7 bekk grunnskóla. Kórinn æfir á þriðjudögum strax eftir skóla (um klukkan 15:00) til 16:00. Áhugasamir geta haft samband við Steingrím kórstjóra í síma 896-8192 eða í netfangið steini@neskirkja.is. Fyrsta æfing verður þriðjudaginn 13. september.

Barnakór Neskirkju (2-4 bekkur)

Barnakór Neskirkju er fyrir krakka í 2 - 4 bekk grunnskóla og eru æfingar strax eftir skóla á fimmtudögm (um klukkan 14:00) til 14:45 í seinasta lagi. Náð er í börnin yfir í Melaskóla og þeim skilað þangað eftir æfingu. Kórstjóri er Hilmar Örn Agnarsson en skráningar skulu berast í netfangið eða í síma 511-1560. Fyrsta æfing verður fimmtudaginn 15. september.

Hljómur

Hljómur hét áður Litli- kór Neskirkju og er kórstarf fyrir eldri en 60 ára. Æfingar fara fram í safnaðarheimili Neskirkju á mánudögum klukkan 14:15 - 15:45. Kórstjóri er Magnús Ragnarsson og gefur hann nánari upplýsingar í síma 698-9926 en einnig má hafa samband beint við Neskirkju í síma 511-1560 eða netfangið runar@neskirkja.is. Fyrsta æfing verður mánudaginn 12. september.

Kór Neskirkju

Kór Neskirkju er safnaðarkór sem hefur verið undir stjórn Steingríms Þórhallssonar, organista Neskirkju, frá árinu 2003. Meginverkefni kórsins eru að leiða safnaðarsöng í Neskirkju og að miðla margs konar tónlist við kirkjuathafnir og á tónleikum. Kórinn er áhugamannakór sem hefur vaxið og þroskast á undanförnum árum. Verkefnaskrá síðustu ára endurspeglar metnað og fjölbreytni.

Kórinn er samansettur af áhugasömum og söngelskum einstaklingum úr sókninni og fá meðlimir hans söngþjálfun innan vébanda kórsins. Hann æfir á miðvikudögum klukkan 19:00 til 22:00 auk raddæfinga einn laugardagsmorgun í mánuði. Kórinn getur alltaf bætt við sig efnilegu og áhugasömu söngfólki og fást allar upplýsingar í síma 896-8192 eða hjá steini@neskirkja.is.

Reglulegar æfingar eru frá seinnihluta ágústmánaðar fram til fyrrihluta júnímánaðar. Æfingar eru á miðvikudagskvöldum frá kl. 19:00 til 22:00. Tvisvar í mánuði eru raddæfingar á laugardagsmorgnum frá kl. 09:00 – 12:00 og þá oftast fyrir hluta kórsins í einu. Að jafnaði er haldin ein æfingahelgi að hausti (október) og önnur eftir áramót (febrúar). Sú hefð hefur skapast að fara með æfingahelgina eftir áramót út úr bænum.

Stjórn og skipulag

Stjórn Kórs Neskirkju er kosin á aðalfundi og stýrir hún öllum málefnum félagsins og gætir hagsmuna þess á grundvelli samþykkta kórsins í samvinnu við kórstjóra. Stjórn er skipuð 5 félagsmönnum; formanni, ritara, gjaldkera og 2 meðstjórnendum. Aðalfundur kósins er í mars á hverju ári. Raddformenn eru kosnir á aðalfundi.

Organisti og stjórnandi Kórs Neskirkju

Steingrímur Þórhallsson fæddist árið 1974 og ólst upp á Húsavík þar sem hann hlaut sína fyrstu tónlistarmenntun við Tónlistaskólann á Húsavík. Sautján ára flutti hann til Reykjavíkur og lauk píanókennaraprófi 1998 frá Tónlistarskólanum í Reykjavík undir leiðsögn Önnu Þorgrímsdóttur, píanókennara og kantorsprófi frá Tónskóla Þóðkirkjunnar með Martein H. Friðriksson dómorganista sem orgelkennara. Þá um haustið lá leiðin til Rómar í Kirkjutónlistarskóla Páfagarðs og útskrifaðist hann þaðan 2001 með Magistero di organo. Þar var hans aðalkennari Giancarlo Parodi.

Haustið 2002 var hann ráðinn organisti við Neskirkju eftir að hafa starfað um tíma sem skólastjóri Tónskólans á Hólmavík. Steingrímur hefur víða komið fram á tónleikum, m.a. á tónlistardögum Dómkirkjunnar, í Hallgrímskirkju, Skálholti, Selfossi og í Reykholti.

Steingrímur stýrir tónlistarstarfi Neskirkju og er stjórnandi tónlistarhópsins Rinascente sem sérhæfir sig í endurreisnartónlist.

Orgelið

Orgelið í Neskirkju var smíðað af þýsk-bandaríska orgelsmiðnum Fritz Noack árið 1999 í Boston og er það annað orgel kirkjunnar. Fyrsta orgelið í Neskirkju var keypt þegar kirkjan var byggð. Það var 21 radda og að einhverju leyti búið til af vanefnum og vankunnáttu. Það var orðið nokkur dyntótt hin síðustu ár. Biskup Íslands, hr. Karl Sigurbjörnsson, vígði nýja orgelið 19. september 1999. Orgelið er 31 radda rómatískt orgel og er þess vegna vel fallið til að leikið sé á það 19. og 20. aldar verk. Fritz Noack segir sjálfur um orgelið: „Það var fljótlega ákveðið að orgelið fyrir Neskirkju yrði að henta fyrir breitt svið orgeltónlistar, fyrir guðsþjónustur, undir kórsöng og fyrir tónleika góðra orgelverka.“ Orgelið sjálft er mjög nútímalegt að hönnun. Spilaborð orgelsins er skilið frá til þess að organistinn geti stjórnað kórnum en tengingar eru undir kórgólfinu. „Registur“ orgelsins eru rafstýrð og búin miklum stillingarmöguleikum. Orgel Neskirkju er sambland af klassísku evrópsku orgeli og amerísku 19. aldar orgeli.

Með tilkomu nýs orgels voru gerðar umfangsmiklar breytingar sem breyttu ásjón kirkjunnar nokkuð að innan. Söngsvalinar voru fjarlægðar, í staðinn fyrir teppi á gólfi kórsins kom steinn og panill á stóra kórveggnum var fjarlægður.